1. Bosh sahifa
2. Yangiliklar

Қишлоқ аёллари спорт мусобақаларида беллашди

×

15 октябрь – Халқаро қишлоқ аёллари куни муносабати билан Бағдод туманида “Қишлоқ жавоҳирлари” деб номланган аёллар спорт мусобақаси ташкил этилди.

Республика Маънавият ва маърифат марказининг туман бўлими ташаббуси ҳамда туман ҳокимлигининг оила ва хотин-қизлар бўлими, спортни ривожлантириш бўлими, мактабгача таълим, шунингдек, халқ таълими бўлими билан ҳамкорликда ташкилланган мазкур мусобақада 20 ёшдан 50 ёшгача бўлган ва ҳозирда турли соҳаларда меҳнат қилаётган аёллар қатнашди.

Мусобақанинг очилиш маросимида туман ҳокимининг ўринбосарлари – Бахтиёржон Холдоров ва Тўлқиной Тожиева сўз олиб, туманда спортни, хусусан, аёллар спортини ривожлантириш борасида амалга оширилаётган ишлар ҳамда эришилаётган натижалар хусусида алоҳида тўхталиб ўтдилар.

Спортнинг пиёда юриш, стол тенниси, бадминтон, баскетбол, волейбол, шахмат ва шашка каби кенг оммалашган турлари бўйича ўтган беллашувларда ҳаваскор спортчилар ўз маҳоратларини тўла намойиш қилишди.

Мусобақалар куннинг иккинчи ярмига қадар давом этди ва ғолиблар аниқланиб, уларга ташкилотчилар томонидан таъсис этилган эсдалик совғалари топширилди.

Бағдод тумани ҳокимлиги Ахборот хизмати.