Yuridik va jismoniy shaxslar tomonidan veb sayt orqali bo'lgan murojaatlar
Jami murojaatlar: 38Ishonch telefoni statistikasi
Иттифоқда инфратузилма билан боғлиқ муаммолар босқичма-босқич ҳал этилмоқда
2022-11-21 15:22:32 303
Бағдод туманининг “Иттифоқ” маҳалла фуқаролар йиғини таркибидаги Янги ҳаёт кўчасида ижтимоий шерикчилик асосида янги трансформатор ўрнатилди. Бу, ҳудуддаги 60 дан зиёд хўжаликни электр энергияси билан сифатли таъминлаш имконини беради.
- Арзимизни раҳбарларга айтдик. Биз томонларда ток кучи жуда паст, айниқса, қиш ойларида аҳволимиз танг бўлади, шу муаммони биргаликда ҳал қилайлик, деб. Раҳмат, сўзимиз ерда қолмади: туман ҳокимининг ёрдами билан кўчамизга янги подстанция ўрнатиб беришди – 50/50 бўлди. Энди мавжуд яроқсиз таянчларни ҳам янгисига алмаштириб олсак, электр бўйича мутлақо муаммомиз қолмайди, - дейди биз билан суҳбатда фаоллардан бири Алижон ака Аҳмадалиев.
Маҳалладаги ҳоким ёрдамчиси Умиджон Янгибоевнинг маълум қилишича, Ўзбекистон Республикаси Президентининг “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги 408-сонли Қарорига мувофиқ, маҳаллада жорий йил якунига қадар аҳолини ичимлик сув билан таъминлаш билан боғлиқ муаммолар ҳам бутунлай бархам топади. Тасдиқланган лойиҳага кўра, Янги ҳаёт кўчасида 4 км масофада янгидан тармоқ тортилиб, мавжуд тик қудуқ таъмирланади. Шунингдек, Навбаҳор, Нурафшон, Истиқлол ва Амир Темур кўчаларида яшовчи аҳоли учун янги тик қудуқ қазилади ва 3 км масофада тармоқ тортиш режалаштирилган. 2 млрд. 50 млн. сўм маблағ сарфланиши кутилаётган лойиҳа тўлиқ амалга оширилгач, 500 дан ортиқ хонадон ичимлик суви билан тўлиқ таъминланади.
- Келгуси йил учун ҳам муайян режаларимиз бор, албатта. Ички хўжалик йўлларини асфальтлаш, янги темир-бетон таянчлар, кўча чироқлари ўрнатиш, умуман олганда, мавжуд инфратузилмани босқичма-босқич янгилаб, аҳоли учун муносиб турмуш шароитларини яратишни мақсад қилганмиз, - дейди Умиджон Янгибоев.
Аввалроқ, Ўзбекистон Республикаси Президентининг “2022-2023 йиларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги 408-сонли Қарорига мувофиқ, Бағдод туманида жами 39 та лойиҳани амалга ошириш учун 32 млрд. 690 млн. сўм маблағ ажратилгани ҳақида маълум қилинган эди (https://t.me/bagdodim_news/21924).
Бағдод тумани ҳокимлиги Ахборот хизмати.
