Президентимиз ташаббуси билан юртимизда “Яшил макон” лойиҳалари амалга оширилмоқда. Бугун Бағдод туманида ҳам ушбу лойиҳанинг кузги мавсумига старт берилди. “Ойдинбулоқ” маҳалласи ҳудудидаги 5 гектар майдонда туман ҳокими, “Нуроний” жамғармаси туман бўлими раҳбари, барча идора ва ташкилотлар раҳбарлари, ходимлари ҳамда маҳалла фаоллари жам бўлишди. — Кузги мавсумда туман бўйича 663 мингдан ортиқ кўчат экилиши режалаштирилган. Туманда кўчат экиш учун жойлар етарли. “Яшил макон” доирасида, бугунги кўргазмали семинаргача туманимизда 27 400 туб мевали ва манзарали ниҳоллар экиб борилди. Билингки, бу кўчатлар шунчаки экилмайди — Экология бўлими томонидан қатъий назорат қилинади. Бугунги тадбирда фақат иштирок этиш эмас, балки ташкилотларингиз ҳудудларида боғ барпо этиш орқали юртимиз, туманимиз ободлигига ҳисса қўшишингизга ишонаман — деди туман ҳокими Ғанижон Солиев. Шу куни ҳудудда жами қарийиб 5 000 туп мевали ва манзарали кўчат экиш ишлари кун бўйи давом этди. Биргина повлония дарахтининг ўзи бўйича 2 мингдан ортиқ кўчатлар экилди. Жараёнда туман ҳокимлиги меҳнат жамоаси, Ободонлаштириш бошқармаси ходимлари ва маҳалладги кўнгиллилар фаоллик кўрсатишди. Улуғларимиз “Бир туп дарахт кессанг — ўн туп эк”, деб бежиз айтмаган. Бутун дунёда экологик ҳолат талаб даражасида эмаслиги сир эмас. Мувозанатни тиклаш кўп жиҳатдан дарахт экилишига боғлиқ.