Бағдод туманида спортнинг “Универсал жанг” тури бўйича мусобақа бўлиб ўтди. Туман “Ҳокими кубоги” соврини учун куч синашган спортчиларнинг кескин ва муросасиз жанги минглаб томошабинларга юқори кайфият улашди. Бағдод тумани ҳокими Ғанижон Солиев мусобақа иштирокчиларига омад тилаб, ринг марказида турнир ташкилотчиларини қутлади ва мазкур спорт турининг ёшлар тарбиясидаги аҳамиятини алоҳида таъкидлади. Марказий ўйингоҳга ўрнатилган ринг, ёрқин чироқлар ва Ватанпарварлик руҳини оширувчи мусиқалар мусобақани шоу кўринишида ўтказилишига замин яратди. Айтиш жоизки, туманимизда фаолият олиб бораётган “Қаҳрамон спорт клуби” тарбияланувчилари ҳар бир жангида маҳорат намойиш этиб, рақиблари устидан йирик ҳисоб билан ғалаба қозонишди. Ғолиб жамоалар ва фаол иштирокчилар мусобақа ташкилотчилари томонидан муносиб рағбатлантирилди.