Марказий ўйингоҳга минглаб юртдошларимиз тўпланди. Қувонч, завққа тўла бундай тантанавор байрамимиз туман аҳли хотирасида унутилмас кун сифатида қолади десак муболаға бўлмайди. Тадбирни туман ҳокими Ғанижон Солиев табрик сўзи билан очди. У иштирокчилар ва улар тимсолида барча туман аҳлини мустақиллик байрами билан самимий муборакбод этди. Шунингдек, сўнгги саккиз йилда мамлакатимизда, хусусан, туманда амалга оширилаётган қурилиш ва бунёдкорлик ишлари, қишлоқ хўжалиги ва ижтимоий соҳалардаги кенг кўламли ислоҳотлар халқимиз турмуш фаровонлигини оширишга хизмат қилаётганини таъкидлади. Тантана аввалида Ўзбекистон Республикаси Давлат мадҳияси янгради. Байрам концертини болажонларнинг саҳна композицияси очиб берди. Тадбирнинг бадиий қисмида туман маданият бўлими ҳаваскорлари иштирок этди. Ўзбекистонда хизмат кўрсатган артист Тўлқинжон Ҳайдаров ва таниқли хонанда Муқаддас Жўраева ижросидаги қўшиқлар байрамга янада файз улашди. Дастурнинг асосий юлдузи — Жалолиддин Аҳмадалиев ижросидаги қўшиқларга каттаю кичик жўр бўлиб рақсларга чорлади. Ўйингоҳ марказида ўрнатилган замонавий монитор ва дилтортар қўшиқлар байрам иштирокчиларига юқори кайфият бағишлади. Тадбир мушакбозлик билан ўз ниҳоясига етди. Юртдошларимизга шоду хуррамлик улашган байрам тантаналари ҳозирда туманнинг барча маҳаллалари ва меҳнат жамоаларида давом этмоқда. Яқинлашиб келаётган мустақиллигимизнинг 34 йиллиги барчамиз учун қутлуғ бўлсин!