Дарҳақиқат, демократик тамойилларга кўра инсон ўз ҳаёт йўлини ўзи танлаши, онг-тафаккурини бошқариши ва ёт ғоялар таъсиридан асраши лозим. Бу борада ҳар қандай кўринишдаги таъсир ўтказишга қаратилган ҳаракат қонунан қораланади. Бағдод туманлик Баҳтиёр (исми ўзгартирилган) ёш бўлишига қарамай, шундай жиноятга қўл урди. У ўзининг “Realme C35” русумли телефони орқали “Telegram” ижтимоий тармоғида “Билолдин @muaxiy” профилидан 2024 йил 1 апрель куни “ISLOMIY IYMONIM UCHUN” номли канал очиб, унга диний маърузалар ва нашидалар жойлаштириб борди. Хусусан, “Ахлуддин Навқотий”га тегишли “Ёлғон гапиришлик ҳақида” маърузаси ортида автомат Калашников тасвири ва “Тавҳид ва жиҳод котибаси” халқаро террористик ташкилоти байроғи акс этган материални 7570 нафар обуначига тарқатди. 2025 йил 29 май куни ҳуқуқни муҳофаза қилувчи идоралар томонидан ўтказилган тадбирда унинг телефони далилий ашё сифатида олинди. Диншунослик экспертизаси хулосасига кўра, у тарқатган файллар Ўзбекистонда олиб кириш, тайёрлаш ва тарқатиш тақиқланган материаллар эканлиги аниқланди. Судда Б.Т. айбини тан олиб, қилмишидан чин кўнгилдан пушаймонлигини билдирди. У Россияда ишлаб юрган пайтида телефон сотиб олганини, “Telegram”да канал очиб диний маърузалар ва нашидалар жойлаштирганини, аммо қилмишининг жиноят эканини тушунмаганини қайд этди. Шу билан бирга, оилавий шароитини ҳисобга олиб, суддан енгиллик сўради. Жиноят ишлари бўйича Бағдод туман суди ишни кўриб чиқиб, Б.Т.ни Ўзбекистон Республикаси Жиноят кодексининг 244¹-моддаси 3-қисми “г” бандида назарда тутилган жиноятда айбдор деб топди ва ЖКнинг 57-моддаси қўлланиб, унга нисбатан 3 йил озодликни чеклаш жазосини тайинлади. Отабек Сиддиқов, Жиноят ишлари бўйича Бағдод туман суди раиси