Бағдод тумани ҳокими Ғанижон Солиев қишлоқ хўжалиги маҳсулотларини экспорт қилиш билан шуғулланувчи тадбиркорлар билан учрашув ўтказди. Туман ҳокимлиги мажлислар залида бўлиб ўтган учрашув очиқ мулоқот шаклида ташкил этилди. Тадбир давомида тадбиркорларнинг фаол иштирокида бир қатор таклиф ва ташаббуслар тингланди. Туман ҳокимининг инвестициялар, саноат ва савдо масалалари бўйича ўринбосари Акмалжон Ашировнинг таъкидлашича, тадбиркорлар дуч келаётган муаммолар ўрганилиб, уларни ҳал этиш бўйича амалий чоралар кўрилмоқда. Учрашув якунида туман ҳокими тадбиркорларга самимий миннатдорчилик изҳор этиб, қуйидагиларни таъкидлади: “Тадбиркорлик соҳасидаги фаол ва самарали меҳнатингиз, инвестиция жалб этишдаги ташаббускорлигингиз, экспорт кўрсаткичларининг юқори даражада таъминланаётгани ҳамда яратган кўплаб иш ўринлари учун чуқур миннатдорчилик билдирамиз. Сизларга келгусида ҳам муваффақиятлар, янги зафарлар ва ривож тилаймиз.”