Маълумки, 2025 йилда Бағдод туманида 4200 гектар майдонда пахта парваришланмоқда. Мўл ва сифатли ҳосил етиштириш осон кечмайди — бу агротехник тадбирларнинг ўз вақтида ва тўғри олиб борилишини талаб қилади. Пахтани қабул қилиш ва қайта ишлаш ишлари тўлиқ ва тизимли ташкил этилса, ҳосилдан олинадиган фойда янада ортиши мумкин. Жорий мавсумда тумандаги 170 та фермер хўжалиги томонидан 18 минг тоннадан зиёд пахта хомашёси етиштирилиши кутилмоқда. Заводда ушбу хомашёни қайта ишлаш орқали саноат маҳсулотлари ишлаб чиқарилиб, қўшимча қиймат яратилиши кўзда тутилган. Бу нафақат иқтисодий самара, балки янги иш ўринлари яратилиши орқали аҳоли бандлигини таъминлашда ҳам муҳим аҳамият касб этади.