“Чигит” пахта қабул қилиш пунктида қишлоқ хўжалиги техникаларининг мавсумга тайёргарлик ҳолати бўйича семинар бўлиб ўтди. Йиғилишда Бағдод тумани ҳокими Ғанижон Солиев, вилоят қишлоқ хўжалиги бошқармасидан Равшанжон Назиров, фермер хўжаликлари раҳбарлари ва механизаторлар иштирок этдилар. — Бугунги кунда фермер хўжаликлари тасарруфида 90 та чопиқ трактори, 300 та шихли барана, 18 та юқори унумли чигит экиш сеялкаси ҳамда 76 схема асосида ишлайдиган 9 та Хитой сеялкаси мавжуд. Шунингдек, 76 қўшқатор схемага эга бўлган 30 дона янги сеялка олиб келинди, — деди туман ҳокими ўринбосари Орифжон Ҳалимов. Йиғилишда туманда мавжуд қишлоқ хўжалиги техникаларининг мавсумга тайёргарлик ҳолатига келтиришда фаол иштирок этган муҳандис-техник ходимлар ва механизаторларга миннатдорлик билдириб, 2 млн. сўмдан пул мукофотлари топширилди. Тадбир қатнашчилари янги йилда янги марралар ва ижобий натижаларга эришиш ниятида эканликларини билдиришди.