Бағдод тумани ҳокими Ғанижон Солиев йиғилиш аввалида давлат хизматчилари олдида турган устувор вазифалар ҳақида тўхталиб, Фарғона вилояти ҳокими ўринбосари Алибек Турсуновга сўз берди. Маълумки, давлатимиз раҳбарининг ташаббуслари билан давлат хизматининг нуфузини ошириш, давлат хизматчиларини ижтимоий ва моддий қўллаб-қувватлаш борасида амалий ишлар олиб борилмоқда. Мулоқот чоғида давлат хизматчилари огоҳ бўлиши лозим бўлган салбий иллатлар, коррупция ҳолатлари, одоб-ахлоқ нормалари, кийиниш ва фуқаролар билан мулоқот қилиш маданияти, давлат идоралари имижига таъсир этувчи омиллар муҳокама қилинди. Шунингдек, бу борадаги норматив-ҳуқуқий ҳужжатлар, давлат фуқаролик хизматчилари этикаси бўйича йўриқномалар ва услубий тавсиялар тақдим этилди. — Давлат хизматчиси ҳар бир ишида намуна ва жавобгарлик тимсоли бўлиши шарт, — деди А.Турсунов.